2011年9月15日星期四

節目教食翅 團體齊抗議 向魚翅say「NO」

《成報》,2011/9/15

  香港人生活富足,乜嘢各國美食、極品佳餚都有得落肚,但係咪真係要魚翅撈飯同魚翅浪口,先叫識食識歎呢?事實上,為咗攞到魚翅,啲人就係咁濫捕鯊魚,然後割走魚鰭,但因為鯊魚肉無乜用,啲人跟住順手將條半生不死嘅鯊魚丟番落海,由得佢等死,咁做真係極之殘忍同唔人道。既然啲魚翅係咁樣得返嚟,好明顯當大家大啖食魚翅嘅時候,就等同做咗幫兇,你話幾唔抵!

  TVB逢周日播放嘅飲食節目《為食總司令》,本月4日播放嘅一集,「幟哥」煮魚翅畀啲嘉賓食,但事件引起香港護鯊會、綠色團體Bloom Association同埋世界自然基金會香港分會(WWF)嘅抗議,一名關注環保嘅市民彭凱恩仲即時去信TVB表達不滿,佢仲好有心咁策動本地環保團體發信到TVB施壓,要求日後唔好再播呢類節目,但佢哋話啲投訴只接獲TVB嘅自動回覆功能回覆,未有正面回應。

有市民稱投訴石沉大海

  無線電視外事部副總監曾醒明回覆本報時強調,《為食總司令》係一如以往嘅飲食資訊節目,志在介紹各地美食,絕對唔存在刻意鼓吹食魚翅嘅信息,而TVB亦一早有指引,對於介紹魚翅,主持人同嘉賓啲對白一定唔可以用:「好食」、「唔食唔得」呢一類字眼,且節目出街前更需通過內部審查小組,認為可以接受方可播放。至於市民稱投訴石沉大海,曾解釋每當有市民來信都會回覆表示收到,佢會了解事件。

  其實,獵殺鯊魚嘅血腥場面,唔少環保團體經已多次展示過,好彩亦都成功令到唔少人醒覺,結婚喜慶擺酒搞宴會,菜單上都唔會有魚翅出現,而且網民發起針對魚翅宴席做七折人情,以示抗議同抵制。所以大家就由今日起,向魚翅say「NO」(說「不」)!