2012年7月27日星期五

籠困狗狗任雨打 打風虐犬賤主犯眾憎

《爽報》,2012/7/27

十號颶風韋森特襲港期間,除咗有大批乘客滯留港鐵車廂同車站,仲有一批狗狗被困一個私人屋苑嘅平台,面對凄風苦雨嘅虐待,慘絕狗寰。住喺對面樓嘅居民直擊呢幕慘劇,有圖為證放上網,睇到個個都好鬼㷫,仲向警方舉報。不過警察到場嘅時候,狗主已收番狗籠入屋。

根據網民留言,事件係發生喺屯門豫豐花園,今個星期初,韋森特襲港期間,住喺某座住宅平台單位嘅狗主,用兩個狗籠困住幾隻狗。狗籠上面有塊布,但係已經被風吹開咗。大風又大雨,狗狗就要瑟縮喺無掩狗籠度任由風吹雨打,我見猶憐。
上載圖片嘅網民鬧爆個狗主:「無良狗主竟然照常將幾隻狗狗用籠困住並放喺平台俾風吹雨打,簡直不知所謂,究竟個主人有冇同情心㗎?平日放平台日曬已經算,十號風球乜蓋都被吹走啦,係咪人嚟㗎!」
警方到場前已收籠入屋

事件輾轉流傳返去豫豐花園嘅社區,屋苑嘅業主網討論區都有人提起呢單嘢。有業主話:「真係冇人性,要隻狗風吹雨打,真係可以告虐待動物。」有業主仲將暴風狗籠比喻為越戰時期虐待美軍戰俘嘅水牢:「唔鍾意狗,就真係唔好養佢喇。」
不過影相嘅人顧住上載圖片上網,冇第一時間報警求助。據網民講,最終都有人報警,但係警察收到舉報後已經太遲;警方回覆報案人話,到過上址睇過,已經無咗個狗籠同埋狗隻。警方叫報案人如果再發現類似情況,就要馬上報警。