官恩娜牧羊狗遭狂徒劏肚

《蘋果日報》，2012/11/21

順天邨上周五發生的虐貓案令人神共憤，原來上周末官恩娜（Ella）家中飼養的3歲大迷你牧羊犬Barney，亦疑被人用尖銳鐵通劏肚，傷口長達4、5吋血流如注。由於傷勢很嚴重，Barney要全身麻醉接受手術，幸牠福大命大逃過一劫，最終大步檻過，愛狗如命的Ella昨日怒吼：「好變態！希望大家愛護動物。」

近年香港發生多宗手段兇殘的殺狗虐貓案，引起社會廣泛關注，上周五，有流浪貓在順天邨遭狂徒踢到嘔血，最後因傷勢太重要人道毀滅，牠臨死前的吐血相在互聯網上瘋傳，網友紛紛狂插兇徒冷血無人性，事件喚起大家要愛護動物，尊重生命。

傷口五吋要縫針

怎知虐貓事件翌日即上周六，家住上水養有四頭愛犬的官恩娜，其中一隻迷你牧羊犬Barney，竟在家中花園內遇襲受傷，懷疑有人用尖銳鐵通伸入花園內，蓄意殘害Barney，結果牠腹部被劏開！昨日Ella接受本報電話訪問，仍餘怒未消說：「花園有兩隻狗，一隻唐狗一隻迷你牧羊，受傷嘅係迷你牧羊，我哋懷疑有人用鐵通傷佢，割開佢個肚，傷口好大有成4、5吋，要全身麻醉縫針。」

Ella透露Barney是她送給妹妹的生日禮物，妹妹很錫牠，事發時Ella不在家中，是哥哥發現Barney無故受傷流血，妹妹立即帶牠睇獸醫，Ella聽家人講述事件時激動難過，她說：「呢兩隻狗喺花園，佢哋見到陌生人會吠，可能有人唔鍾意狗，所以傷害佢，獸醫話冇可能自己受傷，就算狗同狗打交都唔會咁，可能係人為，因為傷口好唔尋常，明顯俾人傷害劏開肚，當時真係好擔心，仲要全身麻醉做手術，好在最後Barney冇事，不過心情麻麻哋，可能傷口好痛，o依家仲要食止痛藥。」

唐狗曾被潑傷眼

雖然懷疑愛犬遇襲，但Ella和家人卻沒有報警，只謂考慮搬屋，Ella說：「費事搞大件事，但都驚有下次，所以諗住搬屋，再落去唔係辦法，因為年幾前唐狗喺花園都試過俾人用清潔劑潑面，對眼紅晒睇唔到嘢，半夜帶佢睇獸醫，好在最後好番。」問Ella是否得罪人？她說：「梗係冇，可能有人唔鍾意狗，其實我住呢區都好大，只識前後幾戶隔籬鄰舍，試過有次閘門閂唔切，隻狗（Barney）走咗出街，咁啱有個男人放狗，佢冇帶狗繩，兩隻狗就打交，佢攞住鐵通想打我隻狗，我都嚇呆咗，好在冇事。」

愛狗如命的Ella對事件覺得很心痛，加上順天邨發生虐貓案，她怒轟虐畜狂徒說：「好變態，可能有人唔鍾意，但希望多啲包容，我好鍾意寶雲道環境，但連帶狗去散步都唔敢，因為嗰度好多告示話有人毒狗，希望大家對貓狗都好啲。」