「馬騮兵團」近月殺入大圍美松苑，一隊30多隻馬騮，每朝清晨浩浩蕩蕩闖入屋苑四處搗亂，潛入民居「爆竊」，令住戶無日安寧，幾乎每日都要展開「人猴大戰」。《蘋果》連日直擊頑猴肆虐罪證，發現牠們行軍有序，有的專責帶隊入屋偷食物；有的當哨兵睇水；有的負責做阻擋追兵的先鋒。有居民埋怨漁護署驅趕不力，助長賊猴氣燄。
住在美松苑康松閣2樓的區先生，上周六返家時，甫開大門即見8隻猴子在客廳大肆搜掠，「「佢哋摷到一哋都係嘢食，一見到我就喺窗口爬返出去，好大隻……啤梨、橙、香蕉、薯片食晒，成間屋亂晒。呢度不嬲治安好好，住咁耐都冇聽過有人偷嘢，反而馬騮入屋就越嚟越猖狂」。
窗邊虎視住戶打邊爐
記者連續多日到美松苑追蹤猴群，發現馬騮兵團多數在清晨6時出動，居民話題都是談論頑猴惡行，「你今日有冇俾班馬騮入屋偷嘢呀？」街坊指，近日有鄰居在家中打邊爐時，一隻馬騮竟闖入屋內，坐在窗邊虎視眈眈，嚇得戶主女兒驚呼狂哭，戶主護女大喝才將猴子嚇退，沿窗門逃去。
住客楊太表示，近10年居民飽受猴子滋擾：「以前都係間中嚟，見到人都驚；o依家日日嚟，完全唔驚人！」屋苑內一間便利店更成猴子偷食物的重災區，街坊無奈說：「呢度已經變成馬騮樂園！」
沿外牆繞鐵絲爬入屋
話口未完，此起彼落的吼叫聲由遠處傳來，記者見到一行30多隻猴子，浩浩蕩蕩從後山奔入屋苑。由年壯的首領打頭陣，較年長和幼小的猴子則跟隨其後，兵分多路入邨搗亂。
保安員立即用雷射電筒照射驅趕，其中一隻猴子突圍跑至康松閣外，坐定定與圍觀居民對峙。有居民作狀用丫叉射擊，頑猴毫無懼色，女保安員噴射清潔劑及開水喉驅趕亦無果。3分鐘後，頑猴見居民散開，就跳進垃圾桶狂摷，弄至一地垃圾。
另一邊廂的樂松閣，3隻壯猴組成「爆格黨」沿地下外牆，繞過防盜鐵絲圈水渠爬上樓。牠們先刺探軍情，發現無人留守單位，就從窗花空隙輪流入屋，拉開窗門入內搜掠；而另一隻則在外把風，賊猴逗留約15分鐘後出來，只見其中一隻口叼番薯，施施然坐在晾衫架享用戰利品，食飽後沿水管而下逃回後山。
保安員驅趕反被戲弄
整個過程猶如專業爆竊慣匪，屋苑保安員疲於奔命對付。有保安員慨嘆，試過驅趕猴子時反被戲弄：「喺頭頂屙尿、食完蕉掟啲蕉皮落嚟！」居民稱，曾見過有猴子爬至30樓單位作案，又摷垃圾桶、張牙舞爪嚇途人、高空擲物等。「佢哋動作靈活，飛簷走壁，點捉呀？」
頑猴玩謝美松苑居民外，附近白田村寮屋及大圍新村單幢式村屋亦無一倖免。記者採訪期間，亦曾多次與猴群擦身而過，但馬騮並不怕人，記者大腳踏地欲驅趕時，反被馬騮撲上來作勢噬咬，面目猙獰，幸記者及時躲開脫險。漁護署過去兩個月共接獲11宗猴子在美松苑造成滋擾舉報，遂在屋苑出入口、公園及便利店對開放置三個捕猴器，四個月內共捕獲四隻猴子。署方評估後，認為牠們不宜野外放生，已人道毀滅，但至今仍無法阻止頑猴肆虐。
另稿:
| |||||||||||||
「馬騮嚟喇，閂窗呀！」面對馬騮兵團入侵，美松苑居民出盡法寶對付猴群。住在附近白田村居民唐小姐帶備一個自製丫叉在身，她表示，曾在回家小路與馬騮窄路相遇：「馬騮走嚟我就用丫叉射，但兩次都中，佢就發惡撲過嚟，嚇到我跌晒啲嘢，要打電話叫老公接我……」有居民透露是漁護署職員「教路」自製丫叉射猴嚇走牠們，但效果不大。 擔心病毒傳播至屋內 保安員、主婦、學生用綠色雷射電筒、丫叉、清潔劑等與馬騮對抗每日上演，又設蚊網、關窗預防，但作用有限，而居民最擔心是猴子入屋會傳播病毒。 香港傳染病學會理事胡德超醫生稱，巿民如被猴子抓傷或咬傷，或會通過唾液或血液感染病毒，引起併發症如腦炎等，嚴重者有機會死亡。此外，猴子亦有機會傳染狂犬病。如猴子只是闖入民居破壞，居民不必恐慌，只須如常清潔家居便可。 另稿:
| |||||||||||||
文章
