2013年1月31日星期四

貓狗奴 掃屎洗籠 Fiona做義工大掃除

《壹週刊》,2013/1/31

愛心爆棚的薛凱琪媽咪,在新界闢地收養照顧過百隻流浪貓,Fiona不時會隨母到場,幫手做義工。日前她帶領近四十名fans,到場為貓大掃除。掃屎洗糧兜洗籠,Fiona落手落腳,唔怕污糟;讓流浪貓乾乾淨淨過年。

全套服務

家有三隻貓的Fiona,最細一隻只有兩歲的Tissue最近因心臟病離世,心情未平復的她,日前吹雞嗌埋大班fans,組團到她媽咪多年前,與友人合資在新界搞的流浪貓場做義工。戴住圍裙的Fiona好熟手,先清潔籠內大小二便,繼而清洗糧兜,接着用大水喉噴水洗乾淨籠,最後噴上消毒劑,全套服務一手一腳。完成清潔工作後,Fiona攞住雞肉餵,更任由牠們撲上身。身為愛貓族,Fiona入到貓屋,見到特別黐身的貓貓在她腳邊打圈撒嬌,即時笑晒,愛貓病逝的她說未有領養貓咪的打算。

熟手技工

洗完糧兜,Fiona再在籠外圍噴消毒劑。做完晒所有清潔工作後,Fiona才跟fans合照。
呼籲收養

「Tissue啱啱走咗,遲啲先再考慮。不過我養啲貓全部都係執返嚟,希望大家如果想養(貓),嚟呢度領養,有好多貓有病,有啲身體仲有缺陷,好需要人照顧。」薛母與友人在新界合資收養流浪貓場已有多年,所有開支包括照顧牠們的工作人員薪金,以至場內任何設施及睇醫生等,均是薛凱琪媽咪與拍檔自費。「其實我都唔知可以捱到幾耐,暫時無諗到咁長遠。呢度好多貓都有病,因為資金有限,大多數都係幫佢哋搽吓藥,唔可以吓吓睇醫生。希望善心人捐助吓,或者動物診所可以收平啲,最好當然係希望可以有好心人收養啦!」薛母說。

開心玩

熱情大黃撲上Fiona身上,食美味雞肉。

豬都養埋

年前有主人被騙買下「迷你豬」,點知愈養愈大,迫於無奈送到場,自費飼養及照顧。不過上星期肥豬因癡肥四肢乏力,現已送到漁農署。

偷食

Fiona把雞肉放在地上,有為食貓乘機偷食。至於烚雞肉留下的雞汁,薛媽會用來撈飯俾動物食,味道可以更香口。

串燒三兄弟

三隻B一字排開,等Fiona餵食雞肉。

扭摸

獨眼黃貓示意Fiona「摸摸」,非常嗲人。