海豚選港姐保育海洋

《明報》，2013/6/22

香港小姐競選每年都吸引唔少佳麗參賽，就連世界自然基金會今年都要加入一爭后冠，噚日宣布提名身長260 厘米、體重近551 磅嘅中華白海豚白海樂（Ruby） 參選。基金會話，來自大澳嘅Ruby 所以要「跳出大海」，主要因為白海豚喺本港海域受到嚴重威脅，數目由10 年前嘅158條減至現時61 條，希望可以喚起港人保護海洋，同促請政府將海洋保育範圍由2%增加到10%。

基金會香港分會高級環境保護主任李美華話，嚟緊會透過網上、街頭請願同社交媒體活動，爭取市民簽名支持Ruby 參選港姐。佢話，Ruby 雖無「葫蘆身形」，但就有「討人歡喜嘅眼神」、「可親嘅笑容」同「滑溜嘅肌膚」，加上有捍衛同保育海洋嘅使命，相信會贏到唔少分數。Ruby 宣布參選，唔知有無機會令今年班港姐佳麗多一個「勁敵」呢？