2013年9月17日星期二

動物權益篇 / 曾志豪

《爽報》,2013/9/16

為咗動物權益,你可以去到幾盡?你願意,把飼養寵物,理解為食煙一樣,要貼警告字句嗎?

現在大小寵物店,都以可愛活潑有趣的狗仔仔做招徠,只強調養小動物好玩的一面,也就是偏執的正面資訊。

這會誤導了消費者以為,和小小狗玩搓肚皮、俾隻手指佢咬半日,就是養寵物的全部內容;卻忽視了徒手執屎換尿片、忍受半夜狗吠、無論身心疲累都要帶動物落街,當然還有貴過人類睇醫生的費用。

當然,更多人仍然白痴到把小動物當作討伴侶歡心的禮物,師兄,你送個限量版手袋做禮物,唔啱心水仲可以去米蘭站換,但你送隻芝娃娃,冇得三個月後換一隻金毛俾你o架。

所以,為免消費者一時衝動,大小寵物店,一律要貼出警告海報,就像煙包警告一樣:「香港政府忠告市民:養寵物要認真,執屎執尿睇醫生,講心仲要講現金,始亂終棄乞人憎!」

寵物店要另闢「聞臭堆填區」,專門擺放動物便便,讓市民聞吓可以有多臭。別只看見雪白可愛的毛毛,也要看看啡啡黃黃的屎屎。

正式買賣時,還要好像到銀行買基金投資,職員要逐條和消費者講清楚:「o依家開始錄音,我講一條,你明就講清楚明白,OK?買寵物涉及風險,你可能三個月就會對佢失去興趣,但佢會成個心都畀晒你,你清唔清楚?」

專欄電郵:mailto:mcwriter@sharpdaily.com.hk