空運精子受孕 導盲犬誕七胞胎

《蘋果日報》，2017/2/2

好萌呀！1歲半、仲接受緊導盲犬培訓嘅黑色拉布拉多犬Eve，上月順產七胞胎導盲犬BB，仲係澳洲首次用境外冷藏精子（Chilled semen）人工受孕誕下導盲犬㖭。BB有4男3女，3隻金棕色毛，另外4隻係純黑色。Eve嘅寄養家庭之前仲特登搬屋，等Eve有間又大又靚嘅「產房」。                                    
澳洲導盲犬學校提供

領展早前透過「愛‧匯聚計劃」捐錢畀香港導盲犬協會買入8隻導盲犬做培訓，其中一隻1歲半的狗女Eve接受人工受孕。協會同八方講，人工受孕成功率一向偏低，過去仲只會喺狗狗居住地為其人工受孕，今次特別透過冷凍精子技術，喺澳洲嘅導盲犬學校（Guide Dog Victoria）運送精子嚟港進行交配，難度好高，一分一秒都要掌握準確，要同時間競賽。

狗女Eve𠵱家一家八口平平安安，BB需要悉心照顧。寄養家庭話，𠵱家最緊要確保7隻BB有足夠營養，狗BB食嘢嗰陣，尾巴會不斷左搖右擺，萬一狗仔尾巴無太大擺動，就要餵奶粉，費事佢哋食唔飽，BB稍後會同大家見面。