2018年3月12日星期一

大圍屋苑猴出沒 窗口𥄫嘢

《蘋果日報》,2018/3/10

美猴王向來畀人感覺調皮又活潑,除咗成群結黨嘅習性,住喺馬騮山等地區嘅馬騮又經常同行山客接觸,培養出唔怕人嘅性格,正係因為唔怕人搞到唔少人巧京京。有網民近日就拍到,馬騮聯群結隊沿大廈牆身水管、冷氣機底花槽隨意攀爬,仲要喺逐家逐戶嘅窗外「偷窺」,拍片者都大叫「好驚呀」。

據網民留言同記者明查暗訪,馬騮出沒嘅位置應該係大圍美松苑,早前已經有網民影到馬騮爬入屋企廚房「偷食」㗎喇。呢個屋苑鄰近城門隧道公路,亦有山路沿穀寮而行,一直至金山郊野公園,兩處相距最近唔到5公里,難怪成為佢哋出沒嘅熱門地方。

其實大圍區居民一直投訴有「猴」患,但至今都冇乜方法解決,有網民就獻計,話只要同大陸人講呢度有馬騮,「佢哋自然會被人食晒」,聽完係咪,笑中有淚?