2018年5月1日星期二

蔣麗芸愛犬 食素兼戒牛

《東方日報》,2018/4/29

狗狗係肉食動物,蔬果一般唔喺佢哋嘅餐單上。民建聯(民記)立法會議員蔣麗芸(Ann)就成功令愛犬鍾意上食素,仲會偷食自家種植嘅香草羅勒(Basil)添!不過Ann深明狗狗始終要食肉,但就堅持戒牛,因為食牛肉「好燥」喎。

偷食香草留齒痕

尋日幾位民記立法會議員同區議員一齊與狗同樂。Ann係愛狗之人,屋企養咗一隻貴婦狗,人狗感情深厚到一個地步,竟然開始跟隨Ann食沙律嘅習慣。Ann話屋企種啲香草,有時見到塊菜有齒痕,就知係小狗偷食。Ann又會日日餵小狗飲四安士水,因為飲夠先有力小便,方便佢霸地盤,不過Ann強調自己會用水沖走啲小便。

同樣養咗一隻貴婦狗嘅黃大仙區議員黎榮浩指,見過有狗主唔識教小狗,就將小狗遺棄,佢認為與其帶小狗上訓練班,不如狗主自己上堂,學習點教寵物喎。至於關注動物福利嘅葛珮帆就自爆,香港年初正式通過禁止象牙交易嘅法案,步伐快過英國,由於香港法律體系源自英國,所以英國駐香港總領事館仲派人同佢取經添。